คำผญา พระไม้: หม่ำ

19

eshann11_praya

หม่ำ
ทางอีศาน ฉบับที่๑๑ ปีที่๑ ประจำเดือนมกราคม ๒๕๕๖
คอลัมน์: คำผญา
Column: Wise Words
ผู้เขียน: พระไม้

“เนื้อดีๆ…ซอยถี่ๆ ฟักแหลกๆ
คั้นแล้ว แดกใส่บั้ง…เคียนข้อต่อกัน” ฯ
เนื้อดี แข่นอั้นตั้น…คั้นใส่หัวผักเทียม
ซอยเทิงตับ…ใส่นำพอด้าม
เอาเทิงม้าม…ลงนำจักสะหน่อย
คั้นให้มุ่นอ้อยป้อย…อุ้ยตุ้ยใส่กัน
ของสำคัญว่านั้น…แม่นข้าวคั่วลงผสม
คั้นจนสมพอควร…จนว่าสีหอมกุ้ม
แล้วจั่งหยุมลงไส้…อัดดียัดแก่น พู้นเด้อ
จนว่าไค่อั้งปั้ง…เป็นหม่ำต่อนนัว
ใส่พกบีกะได้…อุ่งปุ่งคือบักตูม
ส่วนผสมคือกัน…ใส่ตับหรือม้าม
คั้นไว้ จักสองสามมื้อ…สีก่ำพอดีๆ
จั่งค่อยเอามาซอย…แซบหลายกับแกล้ม
หอมแดงผักเทียมพร้อม…ขี้หนูสวนเอามาแนบ
จุ๊กับแจ่วขี้เพลี้ย…พอสะแม้งถืกกัน หลายแล้ว
หรือสิเอาไปย่าง…ขางไฟจักสะหน่อย
ซอยกินกับ ข้าวเหนียวฮ้อนๆ…หลงส้นกะพ่องกัน พู้นแล้ว
ผู้บ่มักหม่ำเนื้อ…หม่ำหมูกะสุดเถียด
ปานบั้งไฟเข้าบั้ง…โขยงขึ้นสู่สวรรค์ คักแล้ว ๚ะ๛

๑๙ กุมภ์ ๒๕๕๖/ยามตุดซ้ายกลางคืน (๒๔:๐๐-๐๑:๓๐ น.)

หนังสือแนะนำ



บทความที่คุณอาจจะสนใจ

WP Facebook Auto Publish Powered By : XYZScripts.com