ส่อวีรชน

[๒]

     คุณชุมพร ทุมไมย,

     คุณวัย เกศศรีพงษ์ศา

     ตามที่พี่ซายของคุณเว้าประวัติคุณให้ฟัง พ่อแม่พี่น้องล้วนแต่ฮักพวกคุณ คุณเรียนเก่ง เป็นเพื่อนฮักของหมู่ แล้วกะเป็นที่คาดว่าในอนาคตสินำพาความเจริญมาให้หมู่บ้าน

     เวลาผ่านมาดนเหิง ๔๕ ปีแล้ว หมู่บ้านเฮาเปลี่ยนไปหลาย ในเมืองกะใหญ่โตโพดพิโล  ความเป็นไปมีทั้งองค์คุณต่อพี่น้องเฮา แล้วกะหมกฝังความเน่าเปื่อยไว้

     ตอนเด็กน้อยคึดฮอดยามปีที่ปอมีราคาเนาะ พ่อเจ้าเฮือนแม่เจ้าเฮือนได้ซื้อทองใส่ พวกเฮากะได้เสื้อใหม่ใส่ไปเอาบุญ แต่น้ำแซ่ปอเหม็นคัก พวกคุณยังจำกลิ่นปอจากปลาซิวที่เอาสวิงส้อนขึ้นมาเฮ็ดกินได้อยู่บ่

     ถนนหนทางบ้านเฮากะซอดถึงกันหมิดแล้ว นี่ขนาดงุบงิบกินกันบักคักเด้ ขัวกะเป็นขัวปูนเหมิด สายไฟฟ้า ท่อประปากะไปฮอดทุกเฮือน ที่มากับความสะดวกคือ วิทยุ โทรทัศน์ พัดลม ตู้เย็น  มอไซค์ รถยนต์

     มีสิ่งของจำเป็นกะต้องหามาไซ่ แต่หลายแนวซื้อหามาเพราะเรื่องหน้าตา มีรถกระบะไซ่งานได้สารพัดประโยชน์กะดีแล้ว อยากได้รถเก๋งอีก  บ้านเฮือนถ้ารักษาปรับปรุงตบแต่งแหน่กะงามโพด แต่อยากได้บ้านตึกตามแบบทันสมัย บ่มีเงินกะเทิ่งกู้เทิ่งยืม จึงพากันเป็นหนี้เป็นสินเหมิดคุ้มเหมิดตำบล

     จำนวนหมู่บ้านทั้งประเทศเดี๋ยวนี้มีสิฮอดแปดหมื่นแห่งแล้ว หากสิรวมทรัยพ์สินเงินทอง รวมมูลค่าผลผลิตที่ขายออกไปแต่ละปีบ่น่อยเด้  คุณเบิ่งดู ธกส.ตั้งมาบ่จักปีมีเงินไหลไปกองอยู่กับเขาจักหลายหมื่นล้านแล้ว  เถ้าแก่โรงสี โรงมัน พวกรับซื้อของเฮาในตลาด พ่อค้าขายเครื่องมือของไซ่ ขายปุ๋ย ขายยา ขายรถ ขายเครื่องไฟฟ้า  นอกจากรวยเพราะค้ากำไร พวกเขายังเป็นเจ้าบุญนายคุณ ที่ยอมรับจำนองจำนำโฉนดที่ดินพี่น้องเฮา

     เรื่องที่ดินนี่สำคัญคัก บ่มีหม่องให้จับให้ฟันเอาคือสมัยทวดสมัยเทียดอีกแล้ว  แบ่งปันพี่น้องลูกเต้านับมื้อสิน่อยลง ราคาแฮงแพงนับหน้า เหมิดดินเหมิดนานี่ถือได้ว่าเหมิดสิ้นชีวิต

     เบิ่งดูไว ๆ นี่ พวกหัวใสเฮ็ดเงินติดปีก หากินบ่จักปีมันเอาบริษัทเข้าตลาดหลักทรัพย์ สามารถดึงสาวเอาเงินไปแตกทุน เฮ็ดนั้นเฮ็ดนี่เพิ่มความรวยได้อีก

     ดั่งนี้ ใผจั๋งสิมาว่าคนที่หาอยู่หากินกับธรรมชาติ เลี้ยงวัวควาย เฮ็ดไฮ่เฮ็ดนา ปลูกผักปลูกหญ้า ว่าเป็นคนทุกข์คนยาก บ่แม่นเด้อ  ความจริงคือ สิ่งที่เฮามีนั้นถืกคนมาเอารัดเอาเปรียบ สูบรีด คดโกง รวมทั้งกดขี่รังแกสารพัด  เรื่องเหล่านี้เกิดมาหลายยุคหลายซั่วคนแล้ว

     คุณทั้งสองเห็นนำบ่

    ฮ่ำฮอน และฮักแพง

____________________________________

     [ขอบคุณช่างภาพ และคนที่เก็บรักษาภาพไว้]

หนังสือแนะนำ



บทความที่คุณอาจจะสนใจ

WP2Social Auto Publish Powered By : XYZScripts.com