ส่อวีรชน

[๓]

     พวกเฮาดีใจหลายที่ได้เห็นภาพหน้าตา ได้ฮู้นิสัยใจคอที่สุขุม เยือกเย็น เว้าน้อย ตรงไปตรงมาของคุณทั้งสอง  ทั้งได้ฮู้จักบ้านเกิด  ได้ยินคำบอกเล่าเรื่องของคุณจากพี่ซายพี่สะใภ้

     ฮู้ว่า พ่อแม่ของชุมพรเสียใจในเรื่องเลวร้ายที่เกิดขึ้นกับลูก เป็นลมแล้วเป็นลมอีก  ฝ่ายพ่อแม่ของวิชัยกะตรอมใจหลาย  ได้หันหน้าเข้าหาวัดสงบจิตใจตั้งแต่นั้นจนมื้อตาย

     ต้องขอบคุณมิตรสหาย ทั้งคนรุ่นลูกหลาน ที่ได้ลงทุนลงแรง ทุ่มเทใจเฮ็ดโครงการ”บันทึก ๖ ตุลา”ขึ้นมา  พวกเขาค้นหาข้อมูล ออกเดินทางจนได้พ้อญาติของคุณ ทำให้พวกเฮาได้ฮู้ซึ้งถึงเลือด เนื้อ และจิตวิญญาณยามคุณยังมีลมหายใจของคุณ

     คุณชุมพร ทุมไมย,

     คุณวิชัย เกศศรีพงษ์ศา

     ความปีติที่ได้ใกล้ชิดคุณทั้งสองแม้วันเวลาผ่านมาสี่สิบกว่าปี เวลาขนาดนี้มันดนนานเกือบท่อชีวิตคน ๆ คนหนึ่งเลยเด้ จึงทำให้พวกเฮามีความสิส่อคุณหลายเรื่องหลายแนว

     หลังจากคุณทั้งสองเสียสละเมื่อวันที่ ๒๔ กันยา  อีกสิบสองมื้อต่อมา ที่กลางมหาวิทยาลัยธรรมศาสตร์ หมู่พวกเฮากะถืกสมุนเผด็จการมันล้อมฆ่า ทุบกระทืบทรมานและเผาทั้งเป็น ๆ ไป ๔๑ คน  ที่รอดตายและถืกจับได้อีก ๓,๐๙๔ คน แล้วพวกมันยังตามล่าตามจับพี่น้องพวกเฮาด้วยข้อหา”ภัยสังคม”ในขอบเขตทั่วประเทศอีกเป็นร้อยเป็นพันคน

     ญาติพี่น้องหมู่เฮาเหล่านี้ รวมทั้งคนอื่น ๆ ที่หลบหนีไปได้ ก็เหมือนกับครอบครับของคุณทั้งสอง  พวกเพิ่นต่างติดตามข่าว ออกซาวหาลูกหลาน  ตาเหลือใจคัก ผู่ที่พบกับความสูญเสียล้วนแต่หัวใจแตกสลาย ปากบ่ได้เว้าบ่ออก

     พ่อแม่บางคนหาลูกบ่พ้อ เห็นหมอดูหม่องใด๋กะเสียค่าคาย ตั้งคำถามให้พ่อหมอทำนายทายทักให้  ว่าลูกของตนที่หาบ่เห็นนั้น หายไปไส ตายหรือยัง หรือเข้าป่าตามที่เขาเล่าลือกัน ถ้าไปจั๋งซั้นตอนนี้ยังมีชีวิตอยู่บ่

     ตลอดช่วงเวลา ๔ -๕ ปี ที่หมู่สหายเฮาต่อสู้ด้วยกำลังอาวุธ ตามแนวทางชนบทล้อมเมือง เพื่อหวังสิปักธงแดงกลางสนามหลวงในที่สุดนั้น  ท่ามกลางสถานการณ์สงคราม ที่ต้องพ้อกับการล้อมปราบ การเจ็บป่วยไข้ และความขาดแคลนในทุกด้าน พวกเฮายังทุ่มเททำงานหนัก  มุ่งดัดแปลงตนเองให้ก้าวหน้า เป็นลูกที่ดีของพรรคฯ ของประชาชน

     จนถึงเมื่อป่าแตก ต้องวางปืนคืนเมืองนั้น เว้าแบบรวม ๆ กว้าง ๆ ถือว่าเป็นข้อจำกัด ความอ่อนด้อย ทั้งแนวทางยุทธศาสตร์และยุทธวิธีของพวกเฮา

     นั่นคือประสบการณ์ที่คนได้เผชิญมา สิบ่อาจลืมได้เลยในชีวิตนี้

     และพวกเฮาบ่เคยลืมสหายที่เสียสละ ถ้าสหายบ่ตายพวกเฮากะบ่รอด รวมทั้งบ่ลืมคุณทั้งสองนำ ทั้งญาติพี่น้องของทุกคน  พวกเฮาถือว่าพวกเพิ่นเป็นครอบครัวนักปฏิวัติ

ฮ่ำฮอน และฮักแพง

WP2Social Auto Publish Powered By : XYZScripts.com