สุริยา บ่ายค้าย แสงลับไลลา
มืดทะมึน เมฆา เคลื่อนมาแทนก้ำ
ฝ้าสีดำ คึ่มมึ้ม หลึมมาเป็นโง่น
ลมทั่ง เทิงถ่าว โหย้น โยนย้าวย่าวไกล
.
ประกาย แสงส่องฟ้า เผลียงเปี่ยงเป็นสาย
แตกไฟ ไปลายลอย ล่ายลงลายตั้ง
หลิงยัง ไกลคือใกล้ มวลเมฆาคุ่ม
ทันดน ไหลลุ่มล้น ฝนเท้งถอกเท ลงแล้ว
.
ยามใด เดฮอดบ้าน ฝนทั่งทางเมือ
ใจคนิง คนคอย เมื่อยามคนองฟ้า
ฝนมา มีคุณให้ ซาวนาไถคราด
ทาดทาม งามท่งน้ำ นาดั้วดั่งสวรรค์ คักแล้ว
.
ฝนแฮงทาง ถี่ถ้วน ธารเถกขจายสาย
รถไปมา ถลาหลบ เฟียดนองฟองฟ้ง
สติ มีคงหมั้น ไปมาดีตลอด
ขอให้ เมือฮอดบ้าน เถิงห้องแห่งคนคอย ดีถ้อน
๙ มิ.ย. ๒๕๕๘
ค้าย : เวลาบ่ายจวนค่ำ. หลึม : มากมาย. หลิง : มอง. ถอก : เท (น้ำ). ดั้ว : งาม (พืชพันธุ์). เถก : เทน้ำทีละมาก ๆ, สาดน้ำแรง ๆ
