อีสานแค้น
อีกาฮ้องกากา
อยู่เถียงนายามเที่ยง
แดดกะฮ้อนเปรี้ยงเปรี้ยง
ตะวันเกลี้ยงปานหมากแตง
ถ้อยแถลงของนายเจ้า
อีสานเฮาคือลาว
แสนสิสุดปวดร้าวยามมีคนมาลบหลู่
อีสานเฮากะฮู้บ่สู้ว่าจังได๋
เว้าอีสานไปเพิ่นกะว่าต่างด้าว
เป็นคนลาวมาก่อกวน
มีคนญวนคนแกวบ้าง
มาเข้าข้างอยู่เบื้องหลัง
หมอลำยังห้ามฮ้อง
อันฮีตครองประจำถิ่น
หากว่าเฮาสิ้นแล้ว
เพื่อนแก้วว่าจังได๋
ทุกข์ยากได้อีสานเอยอีสานแล้ง
ดินกะแห้งอยู่ทุกยาม
คนยังหยามยังเหยียดซ้ำ
คอยกระหน่ำให้ตายไป
พลังเฮายิ่งใหญ่อีสานเอย
เฮาบ่เคยต่อสู้
มันลบหลู่จนเคยโต
ลุกขึ้นมาบาทนี้เอาให้จมแผ่นดิน
………..เอาให้จมแผ่นดิน
ปรีดา ข้าวบ่อ
*จาก นสพ.ประชาชาติ, ๒๕๑๙
**ขอบคุณคุณวิวัฒน์ โรจนาวรรณ ผู้สะสมและค้นพบต้นฉบับ.
