หินช้างสี

• Facebook
• Twitter
• Line

โต่งโหม่ง     คงเขิบตั้ง      ฐานทั่งลงดิน

นี้แม่น       มหาหิน         เหงี่ยงเอียงบังฮ้อน

ซ้างป่า       มาหมายซ้น     ซอนหลังสีฮะ

เอาขี้ตม      แปดแต้ม       เป็นปื้นป่ามฮอย

ภายลุน       คนจึ่งเอิ้น       ฮอยว่าหินซ้างสี

ตั้งเทิง        ภูพานคำ        อุทยานน้ำพองก้ำ

อำเภอ        บ้านฝางขึ้น     จอมภูเหลียวลงเขื่อน

นาม          อุบลรัตน์น้ำ    วังกว้างแก่งกระแส

สายภู        ปานเทพป้าน   คูเขื่อนคึงนึง

สายน้ำ       ปานแพรพรม   เหล่าแถนปูไว้

หินพะลาน   ผาล้าน         ตาตะลึงแลล่ำ

งามปาน      อินทร์แต่งสร้าง           เห็นแล้วเล่าสะออน

มาฮอด       ขอนแก่นต้อง   ตางพักเซามีแฮง

ไปซม        หินซ้างสี        ฮอดบ้านฝางถามได้

มีทัง         ไพรผาล้ำ       แสนงามธรรมซาติ

เขื่อน        อุบลรัตน์ซ้ง    งามแท้ท่านเอย

ชาตรี เสงี่ยมวงศ์

ผญาสมัย

• Facebook
• Twitter
• Line