ส่อแส่ เขาข่าวข้อ ไขป่องแปวเหิน
ความเป็นไป ป่วยปูมเปิงบ้าน
ขุนแข็ง มาปัวปิ้น ฝนยาทาใส่
พยาธิ หยังซ่างดื้อ คีงไข้ไข่บวม ตื่มแล้ว
อันว่า ขวงเข็ดฮ้าย ไพรเผตภูมิผี นี้นอ
ยังวนเวียน ก่องกินกุมเหย้า
จึ่งคน วินเซล้ม ระทมโทรมทรุด
หัวสัก กะเทียมก้ม กองก้นท่าวถม กันแล้ว
หลดแต่ โอมเอกอ้าง ทางเทพทวยแถน
ลงมา กินพาคาย บัดพลีผีฟ้า
ปานนั้น ยังทันพ้อ หมอธรรมวิเศษ
เข้าจ้ำ พามอบม้ม เข็ญฮ้ายพ่ายหนี นั้นนอ
ผ่านมา หมอเสี่ยงข้อง พาไล่พรายผี
ก็บ่ มีทางเห็น ภูติสิงสางก้อม
มีแต่ หมอเมาเหล้า กินคายขายข่าว
ขอกคาม มวลมอดม้วน นำเจ้าเล่าหลาย หลวงแล้ว
ส่อแส่ ไขข่าวแจ้ง แจงป่องทางไป จริงฤา
ใผก็ ว่าใผใค จ่มมนต์ดลได้
“ขอให้ จริงดั่งหว้า สีซมพูดั่งว่า
อย่าคือ ตอกมัดกล้า ดำนาแล้วเหยียบใส่ตม”* นั้นเยอ
๒๑ มิถุนายน ๒๕๖๑
* ผญาของเก่า
