[๑] ผญา… พรปีใหม่
๏ โอนอ…สารนี้ชื่อว่าพิศวาสแหน้น หนักเกิ่งธรณี
ขังขอด สุดวิญญาณ โฮบโฮมคุงฟ้า
เป็นรหัสแจ้ง จักรวาลหมั่นแก่น
ความฮักยังแน่นแฟ้น มีมื้อสิโค่นคลอน ได้แล้ว
๏ สารนี้…เขียนลงมือถือแก้ว รุ่นใหม่ ๔ จี
ไลน์ไปเถิงคนฮัก ผู้หมายเสนห์ซ้อน
ออนซอนคึดฮุ่งชู้ จงจอดพระไมมิตร
สายเสนห์แนน ให้ตอบไลน์อย่ามายม้าง
๏ สารนี้…เขียนจากเคหังห้อง เหินห่างความฮัก
บ้านคะนิงคะเนอุก อั่งมโนมหันต์พ้น
ตำบลโศกากลั้น เวทนาดิ้นดั่น
อำเภออกจักแตกม้าง จังหวัดโอ้อ่าวกระสัน นี้แล้ว
๏ วัน คือความคั่งแค้น หุมเฮ่งทรมาน
เดือน ปานไฟลามลุก ลวบลนฮนฮ้อน
ปี คือนอนหนามข่วง ทวงกระสันอกสั่น
ชาตินี้ ฮอดชาติหน้าพุ้น สินำน้าวหน่วงแนน
๏ บาดนี้ วันสิได้เคลื่อน เดือนสิผ่านราศี
ปีสิลาแล้วเด้อจอ ต่อกุนแล้วเด้อน้อง
คองมาเหิงปีผ้าย กลายไปนับบ่คู่
สิได้ตัดบ้วงห้าง สิได้วางบ้วงเป้ เสนห์ฮ้างปรารถนา
๏ ถามข่าวข้าว ถามข่าวเถิงปลา ถามข่าวนา ถามข่าวเถิงน้ำ
นาสิงาม หย้อนน้ำเพิ่นท่อง เกี่ยวเพิ่นก่อง หย้อนข้าวเพิ่นงาม
ข้าวนาทาม ได้ปีละแหล่ง ข้าวนาแซงได้ปีละเล้า
ถามข่าวเจ้า ถามข่าวหาแฟน ถามข่าวแนน ถามข่าวหาชู้ ฯ
๏ แม่นสิอยู่ฟากฟ้า กงขอบจักรวาล พุ้นดาย
แม่นบ่ไลลืมฮัก ขอบขัณฑ์พระไมม้าง
แม่นสิถือผีด้ำ ผีแถน เสื้อเผ่า ใด๋แหล้ว
พราหมณ์, พุทธ, คริสต์, อิสลามบ่เว้น เวนให้ฮอดกัน หั้นเถิ้น
๏ สีใด๋ กะบ่ไลลาเว้น สิ่วม่วงเหลืองแดง
เขียวขาวนิลชมพู แหล่คราม น้ำตาลส้ม
บ่หลงลมลืมเลี้ยว เสนโหหมั่นแก่น คือเก่านอ
เกิดแล้วตายหมื่นชั้น บ่มีมื้อว่าสิไล
๏ ใหม่กะขอให้ใหม่ตั้งแต่ปี ไมตรีให้คือเก่า
ใหม่กะขอให้ใหม่ตั้งแต่ข้าวขึ้นเล้า เกวียนนั้นแต่เก่าหลัง
๏ ขอให้สุขเสมอหมั่น เสมอมันเครือเก่า
ตราบต่อเท่า เถิงเข้าสู่นิพพาน พุ้นเนอ
๏ วิญญาณให้แจ้งคือหน่วยแก้ว มโนส่องสรญาณ
ปัญญาเป็นประธาน อย่าอ่วยเอียงเผลียงฟ้ง
ขันติเป็นเสาค้ำ อวิหิงสาเป็นไม้ข่ม
อภัยเป็นฮ่มกั้ง พาให้อยู่กะเสิม หั้นเถิ้น ๚ะ๛
๓ ธนู ๖๑/ยามแถใกล้เที่ยงคืน
[๒] เชิญธง
“เว้าแล้วต้องเฮ็ด เฮ็ดให้สุดขุดให้ถึง
ผิดถืกค่อยว่ากัน สิ่งใด๋ดียกยอขึ้น สิ่งใด๋บ่ดีแก้ไข
ทั้งเฮ็ดทั้งเฮียนฮู้คู่กันไป
ความผิดบ่ใซ่ความซั่ว
ความซั่วคือบ่ เ ป ลี่ ย น แ ป ล ง”)
…เกิดเป็นคนทุกคนมีรากเหง้า
ต้องรู้ปัจจุบันเราถึงแก่นแท้
อนาคตเท่าทันหมั่นดูแล
ถูกหรือผิดปรับแก้แน่จริงจัง
“ทางอีศาน” คือทางแห่งมวลมิตร
ทางแห่งการอุทิศคิดปลูกฝัง
ทางแห่งการสร้างปัญญาขุมพลัง
ทางแห่งสังคมเจริญด้วยมือตน
เชิญธงแล้วจ้วงเหล้าจากไหใหญ่
เหล้านี้ต้มด้วยใจรสเข้มข้น
ยกจอกแรกถวายแถนเบื้องบน
สาดจอกสองเพื่อบรรพชนคนสร้างไท
ตำจอกสามพี่น้องมวลสหาย
กินดื่มให้ชุ่มใจกายเพื่องานใหญ่
อิ่มหนำแล้วเราออกเคลื่อนขบวนไกร
ไปเฮาไปไปแปงสร้าง “ทางอีศาน”
ไปเฮาไปไปแปงสร้างประเทศไทย.
