ฝันเห็นกบ แปลเป็นเลข ๓๒

88

ฝันเห็นกบ แปลเป็นเลข ๓๒

นิ ท า น ก้ อ ม

วีรยุทธ สุธาวรรณ : เรื่อง  / ศิลป์วัตร วิศาลศักดิ์ : ภาพ

เฒ่าอั่นหนึ่ง เฒ่าเก่านั่นหละ ผู้เลาเคย ฝันว่าได้กินหมกหน่อไม้ถืกเลข ๕๘ นั่นหละ มีอีกงวด…เลขออก ๓๒

เลากะถืกอีก …หลานบักเก่านั่นหละ กะเลยถามอีกว่า เลาแปลจั่งได๋ กินหมกกบ กับ ๓๒…

หลาน… “งวดนี้ เจ้าฝันว่าจั่งได๋น้อ พ่อใหญ่…”

พ่อใหญ่… “กูฝันเห็นกบ…มันโตนน้ำ…”

หลาน… “เจ้าแปลจั่งได๋ พ่อใหญ่ ฝันเห็นกบเจ้าจั่งแปลเป็นเลข ๓๒ เว้าเบิ่งดู้…”

พ่อใหญ่… “มึงเคยไปหากบ อยู่ทามมูนบ่…”

หลาน… “เคยไปอยู่ พ่อใหญ่ เอาหมาไปนำเอิ้นว่า ไปหาขั่วกบ”

พ่อใหญ่… “เออ นั่นหละ กบมันอยู๋ในบ่อนจั่งได๋ มึงว่า”

หลาน… “มันกะขึ้นงอย อยู่ข้าง ๆ ฝั่งหนองน้ำ”

พ่อใหญ่… “บัดคนไป หมาไปเห็น กบมันเฮ็ดจั่งได๋”

หลาน… “มันกะโตนลงน้ำ”

พ่อใหญ่… “มึงเคยเป็นเด็กน้อย ไปเล่น โตนน้ำมูนบ่”

หลาน… “เคยครับ ขึ้นต้นไม้ โตนลงน้ำมูนยามมีน้ำแก่งขึ้นครับ”

พ่อใหญ่… “ก่อนสิโตน มึงเฮ็ดจั่งได๋”

หลาน… “อ๋อ กะหลับตา แล้วกะนับ ๑ ๒ ๓… แล้วกะโตนต้าม”

พ่อใหญ่… “กะน่านแหล่ว มึงว่า กูฝันคิ้วบ่…ก่อนกบสิโตน มันกะนับคือมึงนั่นหละ… ๑ ๒ ๓ แล้วมันกะโตนน้ำ ต้าม… มันกะ ๒ ๓ หรือซั่น กะ ๓ ๒ มันกะฝันคิ้ว ปานนั้นตั๊วะ…”

หลาน… “โอ๋ย น้อ พ่อใหญ่ ข่อยกะยอมเจ้าแล้วหละ…งวดหน้าฝันอีกแหน่เด้อพ่อใหญ่…”

 

ฮาาาาาาา………

หนังสือแนะนำ



บทความที่คุณอาจจะสนใจ

WP Facebook Auto Publish Powered By : XYZScripts.com